-->

VSA markeer pas met rentekoerse

Suid-Afrikaners, veral diegene met huisverbande, sal Donderdagmiddag weet of hulle meer vir hul skuld moet opdok as die Reserwebank die rentekoers sou verhoog.

Intussen haal wêreldmarkte weer asem nadat die Federale Reserweraad (Fed) in Amerika besluit het om Amerikaanse rentekoerse vir eers onveranderd te hou.

Die agterdeur bly egter oop vir ’n verhoging later vanjaar.

Dr. Janet Yellen, voorsitter, het die Fed se kommer oor internasionale ekonomiese omstandighede uitgespreek.

“Ons besluit weerspieël internasionale ekonomiese en finansiële ontwikkelings wat steeds risiko’s inhou met ekonomiese groei in die buiteland wat steeds stadiger is as verwag.”

Sy het ook gesê hoewel die Fed koerse nou onveranderd gelaat het, sal matige groei in die VSA se ekonomie en sterk indiensnemingsyfers hom toelaat om later vanjaar ’n strenger monetêre beleid (en dus rentekoersverhoging) te volg.

Faktore wat ’n rol in die besluit gespeel het, sluit in dat die Amerikaanse ekonomiese herstel ondanks ’n aantal positiewe syfers wat steeds broos is, terwyl die risiko van stygende inflasie nog ver van die Fed se 2%-mikpunt is.

Die vorige verhoging is gevolg deur aansienlike wisselvalligheid op wêreldmarkte waar swakker as verwagte ekonomiese groei, laer inflasiekoerse en die veranderde Amerikaanse rentekoers langtermynrentekoerse wêreldwyd laat daal het – in sommige gevalle selfs tot negatiewe vlakke.

Die Fed moes dié risiko’s opweeg teen die kanse dat ’n verdere koersverhoging die Amerikaanse ekonomie ’n nodige hupstoot sou gee.

In Suid-Afrika is alle oë nou op die Reserwebank se monetêrebeleidskomitee (MBK) wat ook vandag ’n rentekoersbesluit moet neem.

Ondanks waarskuwings dat ’n koersverhoging skuldbelaaide Suid-Afrikaners asook die armste van die armes uiters nadelig gaan tref, verwag ontleders dat die MBK waarskynlik geen ander keuse sal hê nie as om die repokoers te verhoog.

DIE WEERLOSE RAND TE MIDDE VAN PERSEPSIES VAN STYGENDE POLITIEKE DRUK LAAT ONS GLO DIE RESERWEBANK MOET VROEËR OPTREE, EN WAARSKYNLIK MEER AGGRESSIEF.
Razia Khan, hoofekonoom vir Afrika van Standard Chartered

In Januarie is die repokoers reeds met 50 basispunte tot 6,75% verhoog om inflasieverwagtinge te beperk en die swak rand te ondersteun.

Intussen het die openbare geveg tussen Pravin Gordhan, minister van finansies, en die nasionale vervolgingsgesag daartoe gelei dat die rand verder veld verloor en volgens Razia Khan, hoofekonoom vir Afrika van Standard Chartered, selfs ’n sleuteldrywer geword vir ’n koersverhoging.

“Die weerlose rand te midde van persepsies van stygende politieke druk laat ons glo die Reserwebank moet vroeër optree, en waarskynlik meer aggressief, om sy toewyding tot ’n inflasieteiken van tussen 3% en 6% te toon.”

Sy het enkele dae gelede nog verwag die koers sal onveranderd gelaat word, maar het nou haar vooruitsig verander na ’n verhoging van 50 basispunte wat die repokoers op 7,25% te staan sal bring.

Die waarskynlikheid van ’n styging van 25 basispunte in die repokoers kan voedselinflasie tot so hoog as 10% opstoot, met rampspoedige gevolge vir skuldbelaaide Suid-Afrikaners, waarsku Neil Roets, uitvoerende hoof van die skuldbestuursmaatskappy Debt Rescue.

“Die kombinasie van die droogte, ’n toename in rentekoerse en die vinnig verswakkende rand sal ernstige gevolge vir arm mense hê.”

Al hoe meer mense sal nie hul skuld kan terugbetaal nie. Die meeste verbruikers met skuld is reeds tot 75% van hul maandelikse inkomste aan skuldeisers verskuldig.

“Alhoewel ’n verhoging van ’n kwart persent in die uitleenkoers nie na veel klink nie, word dit voorafgegaan deur ander prysverhogings, veral in voedsel en ingevoerde goedere wat groot druk op verbruikers plaas.”

Ontleders bly verdeeld oor wat die Reserwebank Donderdag gaan doen.

Van die 30 ontleders wat aan ’n Bloomberg-peiling deelgeneem het, voorspel 16 dat die repokoers onveranderd gelaat gaan word, terwyl die res ’n verhoging van 25 basispunte verwag.

“Dit gaan baie naby wees,” sê Thabi Leoka, ’n ekonoom van Argon Asset Management, volgens Bloomberg.

“Inflasieverwagtinge wys dat ons ’n siklus van koersverhogings moet handhaaf, maar as jy kyk na waar [ekonomiese] groei is, kan jy nie te sterk optree nie, anders loop ons die risiko om ’n resessie binne te gaan.”

Need immediate financial help?

Thank you!

We look forward to the opportunity to get you debt-free!

Subscribe to Our Weekly Email